BAGUIO CITY – Napaay manen ti dadaulo ti Registry of Deeds (ROD) – Baguio City nga agparang iti sesyon ti lokal a konseho ti siudad tapnu agpalawag ken sungbatanna dagiti alegasyon a maatap nga anomaly iti opisinana.
Gapu iti daytoy, kinuna ni Councilor Edgar Avila a saanda nga iyaleng-aleng ti saan a panangikaskaso ni Rodil Rivera iti imbitasyon ti lokal a konseho nangruna ta kas maysa nga opisyal ket nasken met a raemen ni Rivera dagiti a simple a pagalagadan.
Nangitunda daytoy tapnu desisyonan ti lokal a konseho a kiddawenda iti National Bureau of Investigation – Cordillera ti panang-imbestigar ti ahensia ti maatap nga iregularidad iti ROD-Baguio nangruna ta maibilang ti rekalmo a graft and corruption.
Kiddawenda met laeng kenni Land Registration Authority Administrator Atty. Renato Bermejo ti napartak a panangipaulogna iti relief order kontra kenni Rivera ken kadagiti maatap a karaman iti anomalya bayat ti imbestigasyon ti NBI-Cordillera.
Kinuna ni Councilor Avila nga idi kalman ket naiturong iti opisina ti Secretary of Justice ti reklamo kontra kenni Rivera ken dagiti empleyado ti ROD-Baguio tapno dagus a marugian ti imbestigasyon iti nasao nga anomalya.
Immunan a kiniddaw ti lokal a konseho ti namindua a panagparang ni Rivera iti sesyon dagitoy tapno agpalawag iti kwestionable a transaction ti ROD-Baguio nangruna iti panakaitantan ti panakaipaluspos dagiti titulo ti daga iti baet a kompleto ti dokumento nga insumitir dagiti kliente dagitoy ken ti maatap a panagpabayadda iti lima ribo a pesos tapnu mapapartak ti panakaipaay dagiti titulo.
