BAGUIO CITY – Nasurok iti P7.03-M ti pakabuklan a danyos iti panakauram ti dua a residential house sadiay Sitio Rocky Side 1, Lubas, La Trinidad itay laeng nabiit.
Sigun kenni Senior Fire Inspector Mark Anthony Dangatan, Fire Marshal ti La Trinidad Fire Station, pakabuklan a P4,537,500 ti dadael iti pagtaengan dagiti agasawa a Reynaldo ken Georgina Velasco bayat a dumanon iti P2,496,000 ti dadael iti nauram a balay ni Easter Tao-ey.
Maipalagip a nangrugi ti nasaknap nga uram iti tallo a kadsaaran a balay dagiti agasawa a Velasco no sadino nairaman ti dua a kadsaaran a balay ni Tao-ey gapu iti kinapigsa ti angin a nangiwaras iti apoy.
Naamuan met a naaramid dagiti dua a residential house iti kayo a rason ti napartak a panagkayamkam ti apoy.
Nagpaut iti agarop tallo nga oras ti uram sakbay daytoy a nasebseban babaen kadagiti nagresponde a miyembro ti Bureau of Fire Protection ti La Trinidad, Tublay ken Baguio City; kadwada dagiti nagduduma nga opisina ti pulisya ti Baguio ken Benguet kasta met dagiti voulunteers a timmulong iti operasion.
Maipalagip a narigatan pay dagiti otoridad a nangresponde iti nasao nga insidente gapu iti kinailet ken pasang-at a kalsada malaksid pay iti presensiya dagiti istruktura ken lugan.
Immuna metten nga indanon ti lokal a gobierno ti La Trinidad ken non-government organizations dagiti relief packs ken tulong pinansiyal para kadagiti 16 a pamilya a napukawan iti pagtaengan gapu iti nasao nga insidente.
Idi laeng kalman ket nangipaay ti Benguet Provicialm Government babaen iti Provincial Social Welfare and Development Office (PSWDO) iti relief packs kadagiti biktima.
Nakaawat dagiti maseknan a pamilya iti pito a kaban ti bagas, 350 a pidaso ti canned-goods, 350 a pakete ti noodles, 25 a pidaso ti hygiene kits, ken 14 nga sleeping kits.
Sigun pay iti BFP-La Trinidad, dumanonen iti 32 ti nailistada a kaso ti uram sadiay La Trinidad, Benguet manipod idi Enero ti agdama a tawen.
