BAGUIO CITY – Dumanonen iti sangapulo ket tallo a gold medals ti nagun-od ti delegado ti rehion Cordillera iti manarimaan a Palarong Pambansa 2017 sadiay probinsya ti Antique.
Maibasar iti datus itay alas dos biente singko ti malem, nakagun-od ti Taekwondo Elementary Division iti innem a gold medals ken maysa a silver medal.
Nakailista met ti Archery Secondary Girls iti uppat a gold medals ken maysa a bronze medal.
Nakaala met iti maysa a gold medal, ken dua a silver medals ti Taekwondo Secondary Girls bayat a maysa a bronze medal iti Taekwondo Secondary Boys.
Ti met Arnis Secondary Girls ket nakaala iti maysa a gold medal ken maysa a silver medal, ti Arnis Secondary Boys ket maysa a silver medal, bayat a ti Arnis Elementary Girls ket nakaala iti tallo a bronze medals.
Nakagun-od met iti maysa a gold medal, maysa a silver medal ken maysa a bronze medal ti Wrestling Secondary Boys bayat a dua a silver medals ken maysa a bronze medal iti Wrestling Secondary Girls.
Kabayatanna, agtaltalinaed a positibo ti delegado ti Cordillera a makagun-odda pay iti ad-adu a medalya iti pasalip.
Iti panakiuman ti Bombo Radyo kenni Jeffrey Aliga, coach ti arnis ti Secondary Girls ti Cordillera delegates, ar-aramiden dagiti atleta ti rehion ti amin a kabaelanda tapnu mangabak dagitoy.
Kinunana nga adu pay nga event ti arnis ti pakipasetan dagiti atleta ti rehion.
Impannakel met ni Aliga a dagiti atleta ti arnis ti Cordillera ket addaan iti potensyal ken gapu iti panagkaykaysa dagitoy ket naalada ti synchronized team ti rehion a bukbuklen ti tallo nga atleta ti silver medal.
Innayunna pay a ti preparasyon dagiti atleta ti rehion ket nangrugi iti panagrugi ti klase idi napalabas a tawen.
Kinunana a year-round training ti ar-aramiden dagitoy isut gapuna a saan a maawan ti Cordillera delegates iti top 4 performers ti arnis national level.
