BAGUIO CITY – Dumanon iti agarup nasurok P1.5 million ti gatad ti dua a balay a nauram sadiay Purok 5, Pinsao Pilot, siudad ti Baguio idi kanikadua.
Maipalagip a naa-anay a nauram ti pagtaengan ti pamilya ni Pascual Bete Timpac Jr. bayat a partially burned ti pagtaengan ti pamilya ni Hermenia Marzan Ramon.
Ti balay ti pamilya Timpac ket dua a kadsaaran a naaramid iti light ken concrete materials.
Sigun iti Baguio City Fire Station, agarup nasurok P30,000 ti gatad ti nadadael iti pagtaengan ti pamilya Ramon bayat nga agarup nasurok iti P1.5 million ti gatad ti nauram a balay ti pamilya Timpac.
Immuna metten nga inaklon ni Mr. Timpac iti panakiyuman ti Bombo Radyo kenkuana a nakitana ti apokona a nakaiggem iti nasindian a kandela ken kalpasan ti sumagmamano a minutos ket nakitana ti iruruar ti asok iti pagtaenganda ken ti panagkayamkam ti apoy.
