BAGUIO CITY – Nanayonan pay ti medalya a nagun-od dagiti atleta ti rehion Cordillera iti manarimaan a Palarong Pambansa 2017.
Sigun kenni Department of Education (DepEd) – Baguio City Sports Coordinator Fernando Eleponga, iti agdama ket tallo a gold medals ti naala ti Team Cordillera babaen kada Eza Rai Yalong iti arnis – secondary girls; Charmaine Angela Villamor iti archery – secondary girls kenni Lemuel Dalgo iti wrestling – secondary boys.
Nakagun-od met ni Ellerson Langaoen iti silver medal para iti wrestling – secondary boys bayat a tallo a bronze medals ti kontribusyon da Glyzel Garambas iti arnis – elementary girls; Danfrey Mark Buyagan iti wrestling – secondary boys kenni Kate Louise Balageo iti archery – secondary girls.
Kinuna ni Dr. Eleponga a dakkel met ti posibilidad nga adda ti magun-od ti delegasyon ti rehion iti taekwondo nga addaan nakataya a 12 a medalya.
Innayonna nga iti combative sports a kadawyan a mangal-ala ti Team Cordillera iti medalya.
Impasiguradona met a natalged latta dagiti atleta ti rehion sadiay nangruna ta adda dagiti mangipapaay iti seguridad ken nainget met ti panangipasiguradoda a nalinis dagiti taraon nga ipapauneg dagiti atleta.
Naamuan nga idi rabii ket naipaiman kenni Yalong ti insentibo daytoy gapu iti nagun-odna a balitok a medalya.
Kiniddaw pay ni Dr. Eleponga ti agtultuloy a panangikararag kadagiti atleta ti rehion para iti kinatalged, salun-at ken panagballigi dagitoy iti manarimaan a Palarong Pambansa.-
