BAGUIO CITY – Nakasaganan ti lokal a gobyerno ti Tuba, Benguet a mangipila iti kaskenan a kaso kontra iti responsable iti panakaibelleng dagiti hospital wastes a nailaok iti pitak iti maysa a dumpsite sadiay Bayacsan, Taloy Sur, Tuba, Benguet.
Iti panakiyuman ti Bombo Radyo-Baguio kenni Mayor Ignacio Rivera, kinunana a nasken a makasuan ti asinoman a responsable iti nasao a banag no mapaneknekan nga adda ti nalabsing a linteg iti panakaibelleng dagiti nasao a klase ti basura.
Kinunana a naduktalan iti imbestigasyon a dagiti hospital wastes ket naigiddan a naibasura iti pitak iti lote ti maysa nga indibidual iti nasao a lugar.
Inlawlawag a maibasar iti report ti Tuba PNP ket impalubos ti agtagikua iti lote ti pannakaibelleng ti pitak iti lotena ngem saanna nga impagarup a mailaok iti daytoy dagiti hospital wastes.
Dinakamatna a makikaykaysa ti lokal a gobyerno ti Baguio City iti pannakaduktal ti ospital a nagtaudan dagiti nasao a basura.
Kabayatanna, agingga ita ket adda latta dagiti nabatbati a hospital wastes iti nakaibellengan dagitoy a dimmanonen iti waig sadiay.
Iti panakiyuman ti Bombo Radyo kenni PCI James Acod, hepe ti Tuba PNP, kinunana a dagiti nasarakan a hospital wastes ket dextrose sets, nagduduma a syringe ken dagum ken wrappings dagitoy, awanan karga a fluid packs, vials, semitransparent rubber tubes ken dadduma a rugit manipud iti medical operation.
Dinakamatna a posible a tallo nga aldaw a naibelleng iti nasao a lugar ti basura sakbay a naireport daytoy kadagiti maseknan.
Innayonna a naibilin ti panangdalus ti maseknan a kontraktor a nangibasura iti rugit ngem saan a kompleto wenno naan-anay a nadalusan dagiti nasao a basura.
Sigun kenkuana, adda pay dagiti nabatbati a basura iti nasao a disso ken posible a maiyanod pay dagitoy paturong iti Nabjeng River gapu iti panagtudona.
Mapagam-amkan met ti dakes nga epekto dagiti nasao a basura iti aglawlaw.
Naamuan a sumagmamanon kadagiti basura ti naiyanod gapu iti panagtudona iti waig a paturong iti Nabjeng River ti Tabaan Norte, Tuba ken ti nasao a karayan ket kangrunaan a pagtataudan ti danum iti maysa a nalatak a resort sadiay La Union.
