BAGUIO CITY – AGTULTULOY ti hot pursuit operation nga ipatpatungpal ti nagtipon a puersa ti pulisya ken militar kadagiti maatap a kameng ti rebelde a New Peoples Army wenno NPA a nangpuram iti dua a volvo truck ti Philex Mining Corporation sa Tapac, Ampucao, Itogon, Benguet itay agsapa.
Immunan a nakaawat iti text message ti Bombo Radyo Baguio manipud iti nagpabigbig a miyembro ti NPA ken impakaammona nga inuramda ti dua a truck ti nasao a kompanya ngem saanen a makontak ti numero idi tawagan daytoy ti Bombo Radyo.
Kinumpirmar met ti militar ti nasao nga insidente ken iti agdama ket mangisaysayangkatda iti kaskenan nga aksyon.
Segun kenni James Taguic, operations officer ti 503rd Infantry Brigade ti Philippine Army, awan ti NPA iti probinsya ti Benguet ken dagiti rimmaut ket posible a nagtaud iti sabali a probinsya.
Kinunana a daytoy ti mangipakpakita a saan a kabaelan ti rebelde a grupo nga aramiden ti ibagbagada, ken ti kabaelanda laeng nga aramiden ket ti mangbotboteng.
Immunan met a nakaawat iti impormasyon ti Bombo Radyo Baguio manipud iti mapagtalkan a source a dagiti suspek ket sangapulo ket lima a kameng ti rebelde a grupo a Chadli Molintas Command.
