BAGUIO CITY – Agbirbiruk paylaeng dagiti pulis kadagiti testigo a mabalin a makatulong iti panakasolbar ti kaso a pammaltog a napasamak iti maysa a panganan sadiay Bokawkan Road, Baguio City idi parbangon kalman.
Immunan a pimmusay iti nasao a pammaltog ni Romeo Dulagan Pimentel Jr., 21-anyos ken residente ti Botiwtiw, La Trinidad, Benguet bayat a natalgeden ti kasasaad ti nadangran a ni Nexon Palsi Cadoy, 20-anyos, tubo ti Bauko, Mt. Province ken residente ti Irisan, Baguio City.
Iti panakiuman ti Bombo Radyo kenni PCI Gil Imado, dadaulo ti Baguio City Police Office – Station 2, kinunana a nakaalada iti video footage manipud kadagiti CCTV camera iti nasao a lugar ngem saan a mairupaan dagiti dua a suspek gaputa nakasuot dagitoy iti face mask.
Immunan a kinuna ti pulisya a mangmangan dagiti biktima iti nasao a panganan idi timmaud ti saanda a pinagkinaawatan iti suspek.
Pimmanaw ti suspek ngem kalpasan ti sumagmamano a minutos ket nagsubli daytoy nga adda ti imetna a paltog, ken pinalpaltoganna dagiti biktima sakbay a naglibas.
Iti agdama ket an-anopen paylaeng dagiti otoridad ti nakalibas a suspek bayat a saanda pay a naamuan ti rason iti saan a panagkinaawatan dagitoy.
