BAGUIO CITY – Agtultuloy ti imbestigasyon ti Baguio City Police Office (BCPO) – Station 7 iti panakapapatay ti pangrabii a gwardiya ti Baguio Market Vendor’s Association Cooperative iti City Public Market idi kanikadwa.
Segun kenni PSIns. Millenium Bantas, dadaulo ti BCPO Station 7, nainget ti ipatpatungpal dagitoy nga imbestigasyon kalpasan a natakwatanda a dinadael dagiti suspek ti CCTV camera iti uneg ti kooperatiba ken tinakawda pay ti data record dagitoy.
Kinunana nga iti agdama ket amin a CCTV footage iti asideg ti crime scene ket repasoenda para iti posible a panakabigbig dagiti suspek.
Immunan a nabigbig ti biktima a ni Robert Oficiar, 27 anyos, awanan ti asawa, agarup lima a tawen nga agserserbi a gwardiya ti nasao a kooperatiba ken residente ti T. Alonzo Street, Baguio City.
Maibasar met iti inisyal nga eksaminasyon ni PSupt. Rodrigo Leal, medico-legal chief ti PNP-SOCO Baguio ket nagsagrap ti biktima iti bagsol iti kanigid a barukong ken iti nagbaetan ti dua a mata daytoy, sumagmamano a sugat iti ulo ken marka iti tengnged daytoy.
Innayonna nga adda pay ti sumagmamano a defense wound iti dua a takiag ti biktima a mangipakpakita a limmaban daytoy.
Kinuna dagiti pulis a nabatad a panagtakaw ti motibo ti nasao a krimen gaputa adda dagiti mapukpukaw a banag iti nasao a kooperatiba a pakairamanan ti vault a naglaon iti kagudua a milyon a pisos a cash malaksid pay iti AVR ti computer ken camera.
Nasarakan metlaeng iti crime scene ti tallo a botelya ti arak.
Maipalagip nga idi kalaman ti agsapa ket sumrek kuman dagiti empleyado ti nasao a kooperatiba iti pasdek idi nakitada a nakalukat bassit ti ridaw ken sadiay a nasiripda ti dara-dara nga opisina ken ti nakadasay a biktima a isut gapuna a dagusda met a nagreport iti pulisya.
