BAGUIO CITY – Nainget a konkondinaren ti lokal a gobyerno ti Tinoc, Ifugao ken dagiti umili sadiay ti panangpapatay dagiti rebelde a New People’s Army (NPA) iti sigud a kapitan ti Barangay Tukucan.
Iti interview ti Bombo Radyo kenni PLt. Melvin Salvador, Deputy Chief of Police ti Tinoc Municipal Police Station, kinunana a naisayangkat ti indignation rally a pinasetan ti lokal a gobyerno ti munisipyo ken dagiti umili sadiay.
Nagimet dagiti nakipaset iti rally iti plaka a nasuratan kadagiti panangkundinarda kadagiti rebelde nga NPA, iti panangipawilda kadagitoy iti lugarda ken iti kiddaw para iti hustisya iti napapatay a sigud a kapitan.
Inuram pay dagitoy ti maysa nga effigy wenno modelo a mangisimsimbolo iti rebelde a grupo.
Idi kalman ket naitabonen ti bangkay daydi Joseph Alicnas Calabson a pinapatay dagiti tallo a rebelde a simrek iti pagtaengan dagitoy sadiay Tukucan, Tinoc, Ifugao idi kanikadua.
Imbati pay dagiti rebelde ti uppat a kopya ti surat nga addaan tatak a Nona Del Rosario Command New People’s Army-Ifugao a nakailanadan ti panagaklonda iti krimen ken iti akusasyonda a ti biktima ket intel ti militar.
Nasarakan pay iti nakapasamakan ti krimen ti basyo ti bala ken bala ti nagduduma ti kalibrena a paltog.
