BAGUIO CITY – Indauluan ni Mayor Benjamin Magalong ti panakaipila ti kaso kontra iti Gateluck Corporation nga akinkukua iti lote sadiay Legarda Road nga ayan dagiti 45 a pine trees a naigagara a mapappapatay.
Sigun kenkuana, 45 a bilang ti panaglabsing iti Environmental Code ti impilada gapu iti panakapapatay dagiti 45 a puon ti saleng.
Kinunana nga arigna naparparigat dagiti kayo.
Dinakamatna a nakumpirkar a kalburo ti kemikal a naikabil kadagiti kayo babaen iti chemical analysis.
Inlawlawag ni Mayor Magalong a mapawilan to ti korporasyon a mangipatungpal iti aniaman a development iti nasao a lote agingga nga adda ti maipaulog a desisyon iti impilana a kaso.
Dinakamatna a posible masuspindir wenno mawaswas ti rehistrasyon ti korporasyon sadiay Securities and Exchange Commission.
Maibasar iti impila a kaso ni Mayor Magalong, agserbi a respondents dagiti amin nga opisyal ti Gateluck Corporation.
Maipalagip a nangisayangkat ti mayor iti surprise inspection iti pribado a lote ti nasao a korporasyon ken sadiay a nakumpirmar ti naigagara a panakapapatay dagiti 45 a pine trees babaen iti panakabarena dagiti puon ti kayo ken panakaikabil ti kemikal kadagitoy.
Inawaganna pay a ‘murder’ ti napasamak kadagiti kayo ken inkarina ti panakaipila ti kaso kontra kadagiti responsable.
Manamnama met nga agipila ti DENR – Cordillera iti sabali a kaso mainaig iti nasao a panakapapatay dagiti kaykayo.
Kabayatanna, dinakamat ni Mayor Magalong a gapu iti insidente ket maingetan ti panakawanawan kadagiti amin a tree cutting permits a maipapaay iti siudad.
