BAGUIO CITY – Impanamnama ti Department of Health (DOH) – Cordillera a mapatawan iti kaskenan a pannusa ti klinika a nasarakan ti infectious wastes dagitoy sadiay Banangan, Sablan, Benguet.
Sigun kenni Dr. Alexie Marrero, dadaulo ti regional epidemiology and surveillance unit ti DOH-Cordillera, manarimaan pay laeng ti imbestigasyon ti Municipal Health Office, Department of Environment and Natural Resources ken ti PNP iti nasao a banag.
Kinunana nga ur-urayenda ti final report tapnu mapatawan iti kaskenan a pannusa ti klinika a mapapati a nangibelleng kadagiti basura dagitoy ken posible a kanselarenda ti lisensiya dagitoy.
Inyunay-unayna met a rumbeng a maibasura a naimbag dagiti infectious wastes nangruna dagiti mabalin a mangitunda iti impeksyon, ken mabalin nga agala dagiti klinika wenno ospital iti pribado a kontraktor a mangakop iti basura dagitoy.
Maipalagip a nasarakan sadiay Banangan, Sablan ti lima a trash bag a naglaon iti dialisis materials particular ti intravenous tubes, gloves, syringe ken dadduma pay idi March 20.
Kinuna ni SPO1 Leobert Cadingan, manipud iti Sablan Municipal Police Station, a dagiti nasao a basura ket manipud iti Cordillera Kidney Specialist Inc. kas maibasar paylaeng iti nasarakan a nagan dagiti pasyente manipud kadagiti naibelleng a handy bag.
Immunan metten a nasarakan sadiay Shilan, La Trinidad, Benguet ti 900 kgs nga IV tube ken syringe manipud met laeng iti nasao a klinika.
