BAGUIO CITY – Im-imbestigaran paylaeng dagiti otoridad ti pakabigbigan ken motibo dagiti dua a suspek a nangpalpaltog iti maysa a laborer a nangitunda iti ipupusay daytoy sadiay Poblacion, La Trinidad, Benguet idi kalman ti rabii.
Nabigbig ti biktima a ni Eric Lauren Tiangga, 34-anyos, naasawaan, tubo ti Bakun, Benguet ken residente ti Windy Hill, Buyagan, La Trinidad, Benguet.
Iti report ti La Trinidad Police, nakaawatda iti impormasyon seknan iti nasao a pammaltog ken iti panagrespondeda ket nadanunanda ti biktima a nakadasay iti kalsada.
Naduktalan iti inisyal nga imbestigasyonda a nakalugan ti biktima iti motorsiklona idi killaat daytoy a pinalpaltogan dagiti dua a suspek a nakalugan metlaeng ti motorsiklo.
Dagus a naglibas dagiti suspek paturong iti direksion ti Cruz, La Trinidad bayat a naitaray ti biktima iti ospital ngem naideklara a pimmusay kalpasan ti sumagmamano a segundo.
Naala manipud iti nakapasamakan ti krimen ti walo a basyo ti bala ken maysa a bala.
