BAGUIO CITY – Nabigbigen ti lalaki a pimmusay kalpasan a natnag iti alad ti hotel kalpasan a pinaltogan ti maysa a guwardya gapu iti maatap a panagtakawna iti nasao a hotel sadiay Salud Mitra, Baguio City idi Enero 24.
Nabigbig daytoy a ni Luigi Correa Mejia, 22-anyos, awanan asawa, maysa nga scrapper ken tubo ti Barangay Uno, Intramuros, Dagupan City.
Segun kenni PSins. Julius Basinga, dadaulo ti Baguio City Police Office – Station 3, nabigbigda ti nasao a lalaki babaen iti intel report dagitoy.
Kinunana nga idi Oktobre ti napalabas a tawen ket immunan a nakemmeg ni Mejia gapu metlaeng iti panagtakawna partikular ti panagsalisi daytoy.
Immapela met daytoy kadagiti kabagyan ti nasao a lalaki nga agparangda ken alaenda ti bangkay daytoy nga agtaltalinaed iti maysa a punerarya sadiay Marcos Highway.
