BAGUIO CITY – Saan pay laeng a nabigbig ti bangkay ti maatap nga agtatakaw a napaltogan ken natnag iti daga manipud iti kalkalay-atenna a pader ti maysa a hotel sadiay Salud Mitra, Baguio City idi kanikadua.
Ti nasao a lalaki ket mapattapatta nga agtawen iti 30, agtayag iti 5′ 2, nakasuot iti nangisit a kallugong, green t-shirt, puraw a sandal, addaan iti dua a silver ring, naka-aritos ken addaan iti tattoo a “MEJIA” iti kanawan a takyag ken tattoo a “BNG” iti kanawan nga abaga.
Iti agdama ket addan ti bangkay iti maysa a punerarya sadiay Marcios Highway.
Kabayatanna, napaneknekan met iti kanayunan nga imbestigasyon dagiti pulis a natakawan dagiti nakacheck-in a guest iti nasao a hotel ken narekober iti suspek dagiti agkakangina a kagawaan kas iti relo, sumagmano a cellphone, laptop ken cash a dumanon iti nasurok P800,000.
Manamnama met a maipasidong ti inquest proccedings ti gwardiya a nakapaltog iti nasao nga agtatakaw.
Maipalagip a kabayatan ti panaglibas ti biktima ken ti kaduana babaen iti panagkalay-atda iti pader ket pinaltogan ti guwardiya dagitoy.
Natnag iti daga ti biktima manipud iti pader nga addaan kangato nga 11 a kadapan ken nagsagrap daytoy iti maysa a tama ti bala ti paltog iti kanawan nga abaga bayat a maysa met iti kanawan a saka.
