BAGUIO CITY – An-anupen ita ti pulisya ti suspek a nangpapatay iti maysa nga Army Reservist sadiay Buyagan, Poblacion, La Trinidad, Benguet idi kalman.
Iti panakiuman ti Bombo Radyo kenni PCI Benson Macli-ing, hepe ti La Trinidad PNP, nangbukel daytoy iti grupo a mangipatpatungpal ita iti hot pursuit operation kontra iti suspek.
Immunan a nabigbig ti biktima a ni Daniel Lacpap, 53-anyos, reservist iti 106th Community Defense Center ken residente iti Buyagan, La Trinidad, Benguet bayat a nagkedked ti pulisya a mangibutaktak iti nagan ti suspek.
Kinuna ni PCI Macli-ing a ti biktima ket binigbig a mismo ti live-in partner daytoy.
Dinakamatna met a posible a love triangle ti rason ti pammapatay gaputa naamuan a kayat ti suspek a subliyan ti live-in partner ti nasao a reservist.
Maipalagip a sinurot ti suspek ti biktima iti maysa a pagtagilakoan sadiay Buyagan, Poblacion ken apaman a talyawen ti biktima ti suspek ket naipasabat ti paltog iti mugingna a dagus nga imputok ti suspek sakbay a naglibas.
Nagtitinnulong met dagiti tallo a barito a testigo a nangbagkat iti biktima ken intarayda iti ospital nupay daksanggasat ta pimmusay daytoy.