BAGUIO CITY – Insumitiren ti Public-Private Partnership for the People (P4) Committee ti lokal a gobyerno ti Baguio kenni Mayor Benjamin Magalong ti memo a naglaon kadagiti terms for negotiation iti narugianen a proseso ti modernisasyon ti Baguio City Public Market.
Iti interview ti Bombo Radyo Baguio, kinuna ni City Administrator ken P4 Commitee chair Engr. Bonifacio dela Peña a dumanon iti 34 a terms for negotiation ti nabukel dagitoy iti uneg ti dua a bulan.
Kinunana nga iti kanito nga aprobaran ni Mayor Magalong ti nasao a memo ket sumreken iti negotiation stage ti lokal a gobyerno ti Baguio ken ti kompanya a nakaipaayan ti Original Proponent Status nga agpaut iti 45 nga aldaw.
Imbinglayna a karaman kadagiti kangrunaan nga isyu iti terms for negotiation ket ti zoning dagiti vendors ken pwesto dagitoy, proteksion dagiti suppliers, lokasyon ken kalawa ti maibangon a moderno a public market, ti buildable footprint ken ti site development.
Inyunay-unayna a kayat ti lokal a gobyerno nga amin dagiti lehitimo a vendors iti merkado publiko ket maipwesto kadagiti nalaka a maturong a kadsaaran iti maisingsingasing a baro a pasdek ti merkado.
Innayonna a gapu iti daytoy ket impasiguradoda ti panakaikonsidera amin a pakaseknan gaputa no marugianen ti negosasyon ket saanen a mabalin a maksayan ken manayonan dagiti terms for negotiation.
Impetteng pay ni Engr. Dela Peña a saan a pinal dagiti probisyon iti proposal ti kompanya a nakaipaayan ti Original Proponent Status (OPS) para iti modernisasayon ti merkado publiko ti Baguio.
Inlawlawagna nga amin dagitoy ket inegosasyon ti P4 Committee tapnu ti siudad ti ad-adda nga agnumar iti proyekto.
Inyunay-unayna a no adda ti maysa a saanda a nainegosasyon iti terms for negotiation ket maideklara a napaay ti entero a proseso ti negosasyon ken mailukat ti dadduma a wagas wenno addang para iti panakapasayaat ti merkado publiko.
Nupay kasta, kinunana a no met nagtunos ti lokal a gobyerno ti Baguio ken ti kompanya a nakaipaayan ti Original Proponent Status iti amin kadagiti 34 a terms for negotiation ket buklendan ti terms of reference.
Innayonna a maipasidong manen ti terms of reference iti swiss challenge ken mailukat kadagiti amin a kayatda ti mangpasayaat iti merkado publiko ken mabalinda nga i-challenge ti nabukel a terms of reference ken ti pinal a plano ti proposed project.
