BAGUIO CITY – Mangipatungpal ti La Trinidad Municipal Police Station iti naisina ken bukod nga imbestigasyonda iti panagpukaw ken panakapapatay ti driver a nasarakan ti bangkayna iti baba ti kalsada sadiay Sitio Marook, Loakan, Itogon, Benguet idi kanikadua.
Sigun kenni PCI Benson Macli-ing, dadaulo ti La Trinidad PNP, nagturong iti opisinana dagiti kabagian ti biktima ken kiniddaw dagitoy ti tulongda para iti kanayonan nga imbestigasyon tapnu mabigbig dagiti naudi a kakadua ti biktima idi rabii ti May 5 a nagpukaw daytoy.
Kinumpirmarna met a drug surrenderer ti LTMPS ti biktima a ni Vener Montilla, 42 anyos, tubo ti Tadian, Mt. Province ken residente ti Alno, La Trinidad, Benguet ken nakasagana payen nga agpaipasidong iti rebahilitasyon.
Innayonna nga agtultuloy ti panakikoordinarda iti Itogon Municipal Police Station para iti napartak a panakarisut ti kaso.
Immunan a kinuna ti Itogon PNP a posible a panagtakaw ti motibo iti nasao a krimen gaputa mapukpukaw ti P20, 000 cash a koleksyon ti biktima, ken posible met nga adda pakainaigan daytoy iti iligal a droga gaputa ti biktima ket drug surrenderer.
Maipalagip a nagkamang iti Bombo Radyo ti pamilya ti biktima kalpasan a nagpukaw daytoy idi May 5 ken nasarakan laengen ti imanmanehona nga fx iti Swamp Area sadiay Km. 6, La Trinidad, Benguet.
