BAGUIO CITY – Agtultuloy paylaeng ti panangberipikar dagiti otoridad kadagiti ID cards a naala iti tallo kadagiti lima a napapatay a suspek ti panag-hijack iti maysa a wing van truck sadiay Benguet idi kalman.
Maipalagip a napasamak ti panag-hijack sadiay La Trinidad, Benguet idi tengngat rabii ti June 30 bayat a napasamak ti engkwentro iti parbangon sadiay Taloy Sur, Tuba, Benguet kalpasan a nakamakam dagiti otoridad dagiti agliblibas a suspek babaen iti na-hijack a truck ken maysa nga SUV.
Iti eksklusibo nga interview ti Bombo Radyo Baguio kenni PCapt. Marnie Abellanida, panakangiwat ti Police Regional Office Cordillera, kinunana nga iti imbestigasyonda ket awan iti listaan ti PNP ti maysa kadagiti nakagan iti naala a dua a PNP IDs bayat a ti maysa pay ket addaan ti kapada a nagan a pulis ngem nabayagen a natay.
Kumkumpirmarenda met iti NBI ti nakalanad a nagan iti naala nga NBI ID iti maysa pay kadagiti napapatay a suspek.
Kabayatanna, iti met sinapataan a salaysay ti driver ti na-hijack a truck, nailanad a napanna kinita ti truck iti tapnu urayen ti agarkila ditoy kas maibasar iti bilin ti amona nga agtagikua iti lugan.
Agur-uray daytoy iti uneg ti truck idi simmangpet ti maysa nga SUV ken dua kadagiti nakalugan ditoy ti immasideg ken naglugan iti truck ken idi inmanehona paruar iti paradaan ket nagbangen iti kalsada ti SUV ken maysa pay kadagiti nakalugan ditoy ti rimwar ken nangiguyod kenkuana paruar iti driver’s side ti truck.
Inluganda ti driver iti SUV ken bayat ti kaaddada iti kalsada ket binugbogda daytoy bayat a liningdanda dagiti matana ken inalada pay ti wallet ken cellphone-na agingga nga inkudtarda paruar iti lugan.
Nakangeg pay daytoy iti uni ti putok ti paltog ngem dagus a nagtaray paadayo agingga a nakadanun iti balay ti kaanakanna a nagpatulonganna agingga a naireport ti insidente iti pulisya.
Kinumpirmar pay ti driver a dua kadagiti napapatay a suspek ket kadwa dagiti uppat a lallaki a pwersado a nangsublat iti imanmanehona a truck ken nangbugbog kenkuana iti uneg ti SUV ken maysa pay kadagiti dua ti nangala iti wallet ken cellphone daytoy.
