BAGUIO CITY – Mangipatungpal paylaeng ti Scene of the Crime Operatives (SOCO)-Baguio iti naan-anay nga eksaminasyon iti bangkay ti babai a nasarakan a nakasako iti igid ti karayana sadiay Camp 2, Kennon Road, Tuba, Benguet iti malem ti January 27.
Sigun kenni PSupt. Rodrigo Leal, dadaulo ti SOCO-Baguio, nakaawat daytoy iti tawag manipud iti ina ti nasao a biktima ket impakitana dagiti ladawan manipud iti crime scene.
Kinunana a sadiay a kinumpirmar ti timmawag a ti biktima ket ti mapukpukaw nga anakna a ni Loren Sta. Rita Lorilla, 40 anyos ken taga-Sasa, Davao City.
Nabigbig ti bangkay babaen iti braces iti ngato a ngipen-na, ti birthmark-na ken ti insuotna a pink blouse a tagikua ti anakna.
Naituding met nga agturong ditoy siudad ti ina ti biktima para iti naan-anay a panangkumpirmarna iti nasao a bangkay.
Sigun kenni Supt. Leal, mangipatungpalda DNA ken dental exam tapnu makumpirmar ti pakabigbigan ti biktima malaksid pay iti complete autopsy nangruna ta nagsagrap ti biktima iti uppat a tama ti paltog.
Naamuan a nagpukaw ni Lorilla idi January 25 kalpasan a nakadanun daytoy iti bus terminal a paturong iti Cabanatuan gaputa agturong daytoy sadiay Nueva Ecija tapnu asikasuenna ti kaso nga impilana iti sigud nga asawana.
