BAGUIO CITY – Simmukon ti shooter wenno ti indibidual a nangpalpaltog iti agkabsat manipud Lubo Tribe sadiay Bulanao Centro, Tabuk City, Kalinga idi July 1.
Sigun kenni PCI Carol Lacuata, simmuko ni Lagasi Bocad, manipud iti Tulgao Tribe kenni Atty. Gelacio Bongngat, assistant regional director ti NBI-Cagayan Valley a mangsaksakop iti Kalinga ken Apayao.
Manamnama daytoy a babaen iti panakakemmeg ni Bocad ket bumaaw ti tension iti nagbaetan ti dua a tribo.
Dinakamatna a ni Bocad ket naibalud metlaeng iti Bilibid gapu iti kaso a robbery idi 2015.
Maipalagip a simmuko metten kadagiti otoridad ti accomplice ni Bocad a nabigbig a ni Basillio Tayyab babaen iti ‘bodong’ kalpasan a nabigbig dagiti dua a suspek babaen iti naisayangkat a proseso ti peace pact ti dua a tribu.
Naamuan nga adda ti ‘bodong’ wenno peace pact ti Tulgao Tribe a nagtaudan dagiti suspek ken ti Lubo Tribe ti agkabsat a biktima a da Basingan ken Belac Banyasan Dallapas.
Nupay kasta, linawlawagan dagiti kabagian ti agkabsat a biktima a ti napasamak ket maysa a krimen ken police matter.
Kinunada nga awan ti tribal war ken dagiti concerned parties ket ‘binodngan’ wenno sangaili sadiay Bulanao Centro, Tabuk City isut gapuna a saksakupen dagitoy ti linteg ti Bodong, ti peace pact ti Kalinga.
