BAGUIO CITY – Agkidkiddaw iti tulong ti pamilya ni Lower Quirino Hill Punong Barangay Van Oliver Dicang kadagiti posible a testigo iti panakatay ti menor de edad a kabsatna para iti naparepartak a panaggaraw ti imbestigasyon ti pulisya.
Maipalagip nga idi kalman ti agsapa ket nasarakan iti karayan iti asideg ti Balacbac Bridge ti bangkay ti 17-anyos a ni Vaughn Carl Dicang nga immunan nga inreport ti pamilyana a mapukpukaw idi pay September 1 ti agdama a tawen.
Impetteng ni Kapitan Dicang nga awan ti makitkitada a rason iti ipupusay ti kabsatda gaputa awan ti bisyo daytoy, nalaing, paborito iti pamilya ken awan ti naibagbagana a parikutna.
Nupay kasta, inaklonna a saanda nga ammo no adda ti naudi a naka-apa ti kabsat daytoy.
Imbingayna a naudi a nakita ti kabsatna sadiay Barangay Balakbak idi September 1 ken idi September 2 a nangrugi ti panangsapolda iti daytoy.
Kabayatanna, patien met ti pulisya a posible a naibelleng laeng iti nasao a waig ti bangkay ti biktima gaputa adayo daytoy iti kalsada ken kabalbalayan.
Iti agdama ket maur-uray paylaeng ti medico legal officer a mangipatungpal iti otopsiya iti bangkay ti biktima.
Kabayatanna, naduktalan iti inisyal nga imbestigasyon a saan a nagsagrap ti biktima iti bagsol wenno tama ti paltog.
Kinuna ni Dicang a kas maibasar iti imbestigasyon ket naitama iti bato ti ulo ti biktima kalpasan a natinnag daytoy waig.
Pagpampanunutan ita ti pamilya Dicang no apay nga iti waig a nasarakan ti agruprupsa a bangkay ti nasao nga estudiante.
Maibasar iti imbestigasion, idi nasarakan ti bangkay ti biktima ket nakasuot pay kenkuana ti bag-na ngem nakalukat daytoy ken mapukpukaw ti cellphone ken tablet ti nasao nga estudiante.
