BAGUIO CITY – Mapattapatta a dumanon iti nasurok P1.4-M ti pakabuklan a danyos dagiti nadadael a poste ken transformers ti Benguet Electric Cooperative (BENECO) sadiay Bokawkan Road kalpasan a dinungpar daytoy iti maysa a truck idi kanikadua.
Sigun kenni Eric De Guzman, Community Relations Officer ti BENECO, manamnama a dumakkel pay ti danyos gaputa nairaman a nadadael ti tallo a poste ken uppat a transformers dagitoy.
Kinunana a gaputa primary line ti nadadael ket naapektaran ti nalawa a passet ti siudad ti Baguio ken munisipyo ti Tuba, Benguet.
Innayonna a kiddawenda met laeng ti panangbayad ti maseknan a driver ti truck a responsable iti napasamak nga aksidente.
Maipalagip nga iti report ket pasalog iti Lower Buhagan Road ti trak nga imanmaneho ni Leonides Madera Tan a naglaon iti adu a sako ti bagas idi napukaw ti preno daytoy.
Indiretso ti driver ti nasao a truck iti kanawan a paset ti kalsada agingga a dinungparna ti kongkreto a poste ti kuryente a nangitunda met tapnu matumba ti poste ken dua pay a dadduma.
Kinuna pay ni De Guzman nga ti panakatumba ti nasao a kongkreto a poste a naglaon ti tallo a transformer ket naiguyod met ti dua pay a poste dagitoy.
