BAGUIO CITY – Mangisaysayangkat iti naun-uneg nga imbestigasyon dagiti otoridad tapnu maamuan ti motibo ken pakabigbigan dagiti suspek a nangpungsay iti ulo ti nasarakan a bagi ti maysa a lalaki sadiay Ambassador, Tublay, Benguet idi kanikadua.
Immunan a nabigbig ti bangkay a ni Harjan Paycao Lagman, 25-anyos, driver ken residente ti Irisan, Baguio City.
Sigun kenni PCapt. Eddie Buclig, hepe ti Tublay Municipal Police Station, mismo a dagiti nagannak ni Lagman ti nangbigbig ditoy babaen iti body size, bado ken peklat iti kanawan a sakana.
Naiturong metten ti bagi iti maysa a punerarya ditoy Baguio City para iti otopsiya bayat nga agtultuloy ti panangsapol dagiti otoridad iti mapukpukaw nga ulo daytoy.
Iti imbestigasyon ti pulisya, idi malem ti Miyerkoles, November 11 ket inreport ti nagannak ni Lagman sadiay Baguio City Police Office – Station 9 a mapukpukaw daytoy.
Nupay kasta, iti kabigatanna, November 12 ket inreport ti nagannak ni Lagman iti pulisya ti posibilidad a nakawtibo daytoy.
Imparangda ti video footage a naala ti CCTV camera sadiay Purok 16, Irisan Barangay ken ditoy a nakita ti panangposas ti tallo a saan pay a nabigbig a lallaki kenni Lagman ken ti pwersado a panangiluganda kenkuana iti maysa a nalabbaga a lugan a nagturong iti saan a masinunuo a direksion.
