BAGUIO CITY – Makasuan iti murder ken frustrated murder ti maysa a babae a negosyante sadiay Alfonso Lista, Ifugao a suspek iti panakasaneb ti lugan dagiti agasawa a negosyante a pagayamna manipud Echague, Isabela iti rabii ti Biyernes, November 29.
Maipalagip a pimmusay ni Orlando Millare Dumlao Jr. bayat a nasugatan ti asawana a ni Michelle Gallevo Dumlao kalpasan a pinalpaltogan ti dua nga armado nga indibidual ti lugan dagitoy kabayatan ti panagbiaheda sadiay Payong, San Quintin, Alfonso Lista, Ifugao.
Iti naala nga impormasyon ti Bombo Radyo manipud iti Alfonso Lista Municipal Police Station, maipila ti dua a kaso iti piskalya sadiay Lagawe, Ifugao kalpasan a nakaurnongda iti ebidensiya kontra iti suspek.
Nupay kasta, kiniddaw ti Alfonso Lista Municipal Police Station ti saan pay a panakadakamat ti nagan ti suspek a maysa metlaeng a negosyante a maibagbaga nga addaan P6-M nga utang iti agsawa a Dumlao.
Nainget met a pinaglibakan ti suspek ti pammabasol kontra kenkuana ken impettengna a saanna a mairusok nga ibilin ti panakatambang ti agasawa a negosyante gaputa pagayamna dagitoy ken dakkel ti utangna a naimbag a nakem kadagitoy.
Immuna metten a kinuna ni PSSgt Bobby Bumanghat, imbestigador ti Alfonso Lista Municipal Police Station a kinuna ni Michelle Dumlao a ti suspek ti adda iti unaan ti convoy dagitoy ngem saan nga inmarayat idi napasamak ti panagtambang kadakuada nga agasawa ken ti timmulong kadagiti biktima ket ti lugan ti maysa a punerarya a dimmalan iti nakapasamakan ti krimen.
