BAGUIO CITY – Inlawlawag ni Mayor Benjamin Magalong a saan pay a maipatungpal ti “No Vaccine, No Ride” Policy ditoy Baguio City.
Sigun kenkuana, urayenda pay ti pinal a pammilin ken pagalagadan manipod iti Land Transportation Franchising and Regulatory Board (LTFRB) sakbay ti naan-anay a panakaipatungpal ti nasao a polisiya ditoy siudad.
Inaklonna met ti rigat wenno parikot iti panakaipatungpal ti nasao a polisiya.
Dinakamatna ti agbalin nga akem dagiti drivers a mangsukimat kadagiti vaccination cards dagiti aglugan a pasahero nangruna iti rush hours nangruna ta makumikom to dagiti drivers kadagiti pasaheroda.
Innayonna nga agbalin to a pakaseknan dagiti drivers dagiti jeep ti panangberipikar iti QR Codes kadagiti vaccination cards nga iparang dagiti aglugan a pasahero, nangruna iti panagduktal no peke wenno lehitimo dagiti QR Codes.
Iti agdama ket nakasentro paylaeng ti Baguio LGU iti implementasyon ti panagaramat ti medical grade a face mask iti nagduduma a lugar iti siudad, pakairamanan dagiti establishimento, iti merkado publiko ken kadagiti parapubliko a transportayson.
Immunan nga inaklon ni BCPO Public Information Officer PLt.Col. Judy Jasmin Palicos iti panakiuman ti Bombo Radyo Baguio a nangrugin a maipatungpal ti “No Vaccine, No Ride” Policy ditoy Baguio kasaruno ti panakaipasidong ti siudad iti Alert Level 3.
Kinunana pay nga addan dagiti nabagaan ken napasubli nga indibidual kadagiti checkpoints kalpasan a nasukimat a saanda a nabakunaan kontra iti COVID-19.
Nupay kasta, inlawlawagna met a saan unay a nainget ti implementasyonda iti nasao a polisiya ken inkalinteganna a nailanad daytoy iti pammilin ti IATF kadagiti lugar a naipasidong iti Alert Level 3.
