BAGUIO CITY – Maipaayan iti umdas a panawen dagiti newspaper, watch repair ken locksmith stands ditoy siudad ti Baguio nga agbiruk iti pagakaranda ken agtungpal iti plano a 0.60 meter setback iti uneg ti maysa nga establishimiento.
Napagnumuan iti public consultation iti lokal a konseho nga iti innem a bulan wenno manipud Enero agingga Hunyo ti sumaruno a tawen 2021 ket agbirukda iti pagakaranda a lugar ken inton Hulyo 1, 2021 ket awanen ti aglako kadagiti sidewalks.
Maipalubos ti panaglako dagiti amin a newspaper ken watch repair stands iti agdama a lokasyonda agingga inton tapos, Disyembre 31 ngem nasken nga agalada ti updated business permits.
Maiyakar met inton Enero dagiti nakapwesto kadagiti naiilet a sidewalks ken ti pakaiyakaranda ket bigbigen dagiti maseknan nga opisina ti city government bayat a mapaka-ammuan dagiti apektado a vendors.
Malimitaran pay ti kaadu dagiti kendi, facemask ken faceshield a mailako kadagiti nasao a pwesto agingga inton tapos ken makumpiskar dagiti mailako a saan met a karaman kadagiti maipalpalubos nga ilako dagitoy.
Maipawil ti agpalawa iti pwesto malaksid iti naituding a 1 meter by half meter ken iwanwan dagitoy ti POSD bayat a nasken a pagtalinaedenda ti kinadalus ken kinasayaat ti newspaper stand wenno watch repair stand dagitoy.
Al-allukuyen met ti lokal a konseho dagiti publication owners ken ti media iti panakibinnadangda iti responsibilidad iti panang-organisa kadagiti nasao a vendors tapnu agbalinda a kooperatiba ken makabukelda ti napintas a katulagan kadagiti agtagikua kadagiti pasdek a mabalin a pagpwestuan dagitoy.
Maibasar iti datus, dumanon iti 41 ti newspaper stands ken 42 a locksmith ken watch repair stands ti masarakan iti sentro ti siudad ti Baguio.
