BAGUIO CITY – Nabara ken atiddog ti nagbalin a taripnong ti kampo ni Atty. Ana Maria Banaag-Rafael ken Engr. Melchor Licoben iti panagsango dagitoy iti headquarters ti BENECO ditoy siudad ti Baguio.
Maipalagip a ni Atty. Rafael ti dinutukan ti National Electrification Administration-Board of Administrators kas general manager ti BENECO bayat a ni Engr. Licoben ti agdama nga officer-in-charge ti BENECO nga inyendorso dagiti Board of Directors ti kooperatibas kas full-fledged general manager dagitoy.
Impetteng ti kampo ni Atty. Rafael a daytoy ti baro, lehitimo ken kakaisuna a general manager ti BENECO ken pormal a nagtugaw idi pay August 27, 2021.
Impasiguradona met a saanna a kasuan dagiti empleyado a nangbarikada iti headquarters ngem maipaayan dagitoy ti gundaway nga agpalawag.
Impettengda met a nasken nga agtrabaho latta dagiti empleyado ti kooperatiba tapnu saan a maapektaran dagiti member-consumers ken saandan nga agpa-aramat iti nasao nga isyu.
Kabayatanna, impetteng met ni kampo ni Engr. Licoben a daytoy latta ti agtalinaed a general manager ti BENECO ken aniaman a pammilin nga ipaulog ita ni Atty. Rafael ket saanda a bigbigen.
Impanamnama met ni Engr. Licoben kadagiti member-consumers ti kooperatiba a saan a makompromiso dagiti serbisyo nga ipapaayda iti baet ti agdama a krisis iti management.
Impasiguradona met a no anyaman ti agbalin a desisyon ti Board of Directors ti BENECO iti maangay a taripnong dagitoy inton bigat ket respetuen ken surutenna.
Naituding a talantanen ken kedngan ti Board of Directors ti BENECO inton bigat, August 31 iti regular session dagitoy ti endorsement ni Atty. Rafael.
