BAGUIO CITY – Imbilin ti dadaulo ti Kalinga Police Provincial Office ti panakaimbestigar ti pulis a nairaman iti viral nga istorya ti Briton a ni David Wenham.
Kinumpirmar ni PSSupt. Alfredo Dangani iti Bombo Radyo nga adda ti pulis a managan iti Brazilio Boringa a nakadestino sadiay Taga, Pinukpuk, Kalinga.
Segun kenkuana, binilinnan ti hepe ti Pinukpuk PNP tapnu mangipatungpal iti imbestigasyon nu pudno ti nailanad iti diary ni Wenham.
Impettengna a nu mapaneknekan nga adda ti linabsing ti nasao a pulis iti Code of Conduct ti PNP ket mabalin daytoy a mapatawan iti kaskenan a pannusa nangruna nu adda pay ti kanayunan a reklamo a mapila kontra iti daytoy.
Maibasar iti diary ti nasao a Briton, ni Boringa ket maysa a pulis nga addaanen iti asawa ken daytoy ti simmurotan ti kontrobersiyal nga Ammacian woman.
Kabayatanna, panggep met ni Kalinga Rep. Sonny Mangaoang a mangisayangkat iti kaskenan nga imbestigasyon mainaig pay laeng iti viral story.
Iti panakiuman ti Bombo Radyo, kinuna ti kongresista, a nasken a maamoan met ti benneg ti managan iti Maribel Agliam a maibagbaga a taga-Ammacian, Pinukpuk, Kalinga.
Kinunana a nasken a madengngeg ti benneg daytoy gaputa ti bersyon laeng ti ganganaet ti naipablaak iti social media.
Immunan a kiniddaw dagiti sumagmamano a taga-Kalinga ti panagparangen ti nasao a babai tapnu mangipaay iti kaskenan a pammalawag mainaig iti nasao nga insidente.
Maipalagip a viral agingga ita ti istoya ni Wenham a nagayat iti maysa nga Ammacian woman a nangallilaw, nangaramat ken nangibus iti kwarta daytoy.
Iti agdama ket maibagbaga nga adda daytoy iti Bureau of Immigration (BI) gaputa ‘overstaying’ ditoy pagilian, ken saan a makapanaw gaputa awan ti nabati a kwarta daytoy.
Ipadpadas met ti Bombo Radyo News Team nga alaan iti reaksyon ti BI mainaig iti nasao nga insidente.
