BAGUIO CITY – Naipaiman iti National Bureau of Investigation (NBI) ti kidnap-slay case daydi Harjan Lagman ti Baguio City.
Sigun kenni Baguio City Police Office (BCPO) City Director PCol. Allen Rae Co, babaen iti daytoy ket maipasigurado ti patas nga imbestigasyon ken mapunas ti aniaman a panagduadua iti integridad ti imbestigasyon ken alegasyon iti posible a cover-up.
Innayonna a boluntaryo a nag-inhibit ti BCPO iti imbestigasyon ti kaso isut gapuna nga impaimada daytoy iti NBI a sister agency ti Philippine National Police.
Maipalagip a kabayatan ti imbestigasyon ket naduktalan a dua a kameng ti Regional Drug Enforcement Unit ti Police Regional Office Cordillera (PROCOR) ti karaman iti panakakawtibo ken panakapapatay daydi Lagman.
Innayon ni Col. Co a makikoordinar ti BCPO iti NBI ken impaimada kadagiti imbestigador ti NBI ken iti abogado ti pamilya ti biktima amin a dokumento ti kaso nga iggem ken naurnongda.
Impettengna manen nga agtaltalinaed ti committment ti pulisya iti panakaragpat ti hustisya para iti biktima ken iti pamilya daytoy babaen iti panangipaayda iti sibubukel a kooperasyon ken suporta iti imbestigasyon nga isayangkat ti NBI.
Maipalagip a nawaswasen ti Regional Drug Enforcement Unit babaen kenni PBGen. R’Win Pagkalinawan, dadaulo ti PROCOR.
