BAGUIO CITY – Awan iti koneksionna iti umadani a barangay election ti napasamak a panakapalpaltog ti maysa a barangay kagawad, ti asawa daytoy a barangay captain ken ti kabsat daytoy a babae sadiay Pidigan, Abra idi napalabas a lawas.
Sigun kenni PCI Carol Lacuata, panakangiwat ti Cordillera PNP, saan pay a maikonsidera nga election-related incident ti krimen gaputa saan pay a nakaipila iti certificate of candidacy ti pimmusay a biktima.
Kinunana a kas maibasar iti imbestigasyon dagiti pulis ti Abra ket naduktalan nga ‘old grudge’ wenno nabayag a gura ti rason iti panakapalpaltog dagiti biktima.
Dinakamatna a maipila metten ti kaso a murder ken double frustrated murer kontra iti dua a suspek a nabigbig a da Joseph Tejero Pelor ken ni Ariel Isao.
Maipalagip nga idi Abril 15 ket pinalpaltugan dagiti nakamotorsiklo a suspek ni Immuli First Barangay Kagawad Victor Dela Cruz Pisco ken nairaman ti asawana a ni Punong Barangay Elida Sales Pisco ken ti kabsatnas a ni Myrna Pisco-Vasquez kabayatan ti panagbiahe dagitoy iti Pidigan-Pilar Provincial Road nga agturong iti barangay dagitoy.
Naideklara a dead on arrival iti pagagasan ti kagawad bayat nga agpapaimbag paylaeng ti asawa ken ti kabsat daytoy.
