BAGUIO CITY – Posible nga ordinaryo nga apa ti rason iti napasamak a pammagsol sadiay San Carlos Heights, Irisan, Baguio City idi kanikadua a nakatayan ti maysa a land surveyor.
Sigun kenni PSI Pablo Emmanuel Nead, commander ti BCPO-Station 9, daytoy ket gaputa awan ti natakaw kadagiti aniaman a personal a kagawaan ti biktima.
Kinunana nga adda metten ti person of interest a kitkitaenda iti nasao a kaso nupay nagkedked a nangipaay ti kanayonan nga impormasyon tapnu saan a masinga ti imbestigasyon.
Kabayatanna, naituding a maiyawid ti biktima a ni Harold Gideon Madallang Chumacog iti pagtaenganda sadiay Victoria Village, Baguio City kalpasan ti panakaipasidongna iti otopsiya sadiay Benguet General Hospital.
Naamuan met iti PNP-Scene of the Crime Operatives (SOCO) a ti nangitunda iti ipupusay ti biktima ket ti nasagrap daytoy a bagsol iti tiyan malaksid pay nga adda ti bagsol iti kanigid nga ima daytoy.
Maipalagip a paawiden ti dua a concerned citizens a nakalugan iti van idi nakitada ti biktima a nakadasay iti igid ti kalsada ken idi inasitganda daytoy ket nakitada ti dara-dara a biktima.
Inlugan ken intarayda ti bikitima iti ospital ngem naideklara a dead on arrival.
