BAGUIO CITY – Kidkiddawen manen ti Baguio City Police Office – Station 7 ti panakibinnadang ti asinoman a nakakita iti kaso ti pammaltog sadiay sadiay Otek Street, siudad ti Baguio idi June 28 a nakatamaan ti maysa a balasang.
Sigun kenni PO3 Joseph Dulnuan, imbestigador ti kaso, negatibo ti resulta ti panangikomparada iti dua a paltog dagiti indibidual iti nakapasamakan ti insidente manipud iti bala a timmama iti ulo ti biktima.
Kinunana nga inadalda dagiti footages dagiti CCTV cameras a naimuntar iti asideg ti crime scene ngem kasapulanda latta ti kanayonan a testigo.
Naamuan nga idi July 29 ket nakaruaren manipud iti ospital ti biktima a ni Jenalyn Rosimo, 21-anyos, estudyante, agtatrabaho a service crew iti maysa a hotel ditoy siudad ti Baguio, residente ti Poblacion, La Trinidad, Benguet ken agturpos kuma a cum laude.
Iti agdama, addan ti balasang iti natalged a kasasaad nupay saan paylaeng a naikkat ti bala a timmama iti ulo daytoy.
