BAGUIO CITY – Imbilin ti Regional Trial Court, Branch 7 iti Baguio City ti panangisumitir dagiti petitioners ken ti kampo ni tribal leader Roger Sinot iti position paper.
Agserbi a basaran ti korte dagiti maisumitir a petition papers tapno makedngan ti kiddaw a pannakaipaulog ti writ of preliminary injuction ken motion for reconsideration kontra iti panagtugaw ni Sinot kas Indigenous Peoples Mandatory Representative (IPMR) ti siudad.
Gapu iti daytoy ket manamnama nga agisumitir iti position papers ti dua a kampo inton Lunes sakbay nga agpaso inton Martes ti temporary restraining order nga impaulog ti korte kontra iti panagtugaw ni Sinot iti konseho ti siudad.
Kabayatanna, iti naangay a panagdengngeg iti korte idi kalman ket naiparang ni Mr. Gaspar Cayat a maysa kadagiti lider ti tribo dagiti Kalanguya ditoy siudad.
Impetteng ni Cayat a saan a naipaayan iti gundaway dagiti Kalanguya a makipaset iti proseso iti pannakapili ni Sinot kas pannakabagi dagiti nainsigudan nga umili.
Innayonna a rumbeng koma a naiyuman met laeng kadagiti Kalanguya ti pannakapili ni Sinot gaputa karaman dagitoy kadagiti grupo dagiti nainsigudan nga umili ditoy siudad ti Baguio.
