BAGUIO CITY – Ad-adalen ti pulisya no pudno ti posibilidad a kinettel ti lalaki a nasarakan a bangkay sadiay Crystal Cave, Bakakeng, Baguio City ti bukod daytoy a biag.
Immunan a nabigbig daytoy a ni Arthur Andaya Liberiano, 22-anyos, baro ken residente ti Tarlac City.
Sigun ti inana a ni Arlene Andaya, pimmanaw ni Arthur iti pagtaenganda iti alas singko ti malem ti September 25 tapno agbiruk ti panggedan sadiay Mabalacat, Pampanga.
Nupay kasta, saanen a nagaw-awid ni Arthur iti pagtaenganda isut gapuna nga impaka-ammoda a mapukpukaw daytoy agingga a nakumpirmarda a ni Arthur ti nasarakan a bangkay ditoy siudad ti Baguio.
Kinuna met ti kabsatna a ni Mary Ann Lorenzo a tinakaw ni Arthur ti paltog ti asawana a ni 2Lt. Rody Lorenzo Jr. sakbay a nagturong ditoy siudad.
Maibasar ti imbestigasyon ti pulisya, mapapati a pinaltugan ni Arthur ti mismo nga ulona gapu iti nasarakan a paltog iti abayna idi nasarakan ti bangkay daytoy.
