BAGUIO CITY – Saan a makatabuno ni Presidente Rodrigo Duterte kadagiti highlight activities ti 23rd Baguio Flower Festival wenno Panagbenga 2018.
Sigun kenni Mayor Mauricio Domogan, saan a pinatgan ti Malacañang ti imbitasyon ti lokal a gobyerno ti siudad a panagserbi ti presidente kas kangrunaan a sangaili iti Panagbenga.
Kinuna ti mayor a nangipatulod ti presidente iti surat iti lokal a gobyerno ken inlawlawag daytoy a makumikom daytoy ita a bulan ti Pebrero.
Nupay kasta, nadutukan ni sigud nga MMDA chairman ken agdama a Presidential Adviser for Political Affairs Francis Tolentino kas kangrunaan a sangaili iti pannakarambak ti Panagbenga.
Iti baet met ti panangpaay ni Pres. Duterte iti imbitasyon ti siudad ket impanamnama ti Malacañang ti suporta ti presidente iti pannakapasayaat pay ti sektor ti turismo ti siudad.
Maipalagip nga iti panaglukat ti Panagbenga ket indanun ni Presidential spokesperson Harry Roque ti panangbigbig ti presidente ti kinapateg ti pannakarambak ti Panagbenga iti panakapatalinaed ti nadur-as a turismo iti siudad ti Baguio.
