BAGUIO CITY – Agtultuloy ti clearing operations nga ipatpatungpal ti Regional Public Saftey Battalion wenno RPSB, Benguet Provincial Public Safety Company wenno PPSC, Baguio City Public Safety Company, ken Philippine Army iti napasamak nga engkwentro sadiay Camp 4, Tuba, Benguet idi rabii.
Segun kenni PSupt. Mark Pespes, ground commander ti RPSB, adda dagiti tropa ti pulisya nga agserserbi a blocking force ti PPSC a mangkamkamat kadagiti maatap a kameng ti New Peoples Army.
Kinunana a malaksid kadagitoy ket adda met laeng dagiti kameng ti Special Action Forces a naideploy tapnu tumulong iti clearing operations.
Dinakamatna a tumultulong metlaeng dagiti kameng ti La Trinidad PNP, Tuba PNP ken Itogon PNP iti nasao nga operasyon.
Kinunana met nga awan pay ti pakabuklan nga impormasyon dagitoy nu adda ti pimmusay iti benneg ti rebelde a grupo.
Innayunna a kasapulan nga e-account dagitoy nga umuna sakbay nga ibagada nga adda ti casualty.
Impanamnamana met nga iti agdama ket awan ti nadangran iti benneg ti tropa ti gobyerno.
