BAGUIO CITY – Nasken nga ituloy dagiti estudyante a nakipaset iti Cordillera Administrative Region Athletic Association (CARAA) Meet 2017 ti panakipaset dagitoy iti tay-ak ti sports gaputa maysa daytoy a wagas tapnu madiskubre ti talentoda.
Nagbalin a balakad daytoy ni Baguio City Mayor Mauricio Domogan iti closing ceremony ti CARAA Meet 2017 a naangay ditoy siudad ti Baguio.
Impettengna a maysa metlaeng daytoy a wagas tapnu maisuro kadagiti atleta nga estudyante ti umno nga sportsmanship, karakter ken panag-ug-ugali tapnu maragpat ti balligi.
Nagtalinaed met nga overall champion ti syudad ti Baguio a nakagun-od iti pakabuklan a 232 gold medals, 112 silver medals ken 59 gold medals; maikadua ti probinsia ti Benguet nga addaan pakabuklan a 33 gold medals, 78 silver medals ken 83 bronze medals bayat a maikatlo ti Mt. Province nga addaan pakabuklan nga 18 gold medals, 20 silver medals ken 62 bronze medals.
Nagun-od met ti probinsya ti Kalinga ti maikapat a puwesto nga addaan pakabuklan a 16 gold medals, 37 silver medals ken 36 bronze medals; maikalima ti Apayao nga adaan iti 16 gold medals, 33 silver medals ken 61 bronzemedals; maikanem ti Ifugao nga addaan iti 10 gold medals, 36 silver medals ken 72 bronze medals bayat maikapito ti Abra nga addaan ti 10 gold medals, 19 silver medals ken 32 bronze medals.
Kabayatanna, saan paylaeng a naiwaragawag ti sumaruno a probinsiya a mang-host iti a CARAA Meet iti sumaruno a tawen nupay mapagpilpilyan ti probinsiya ti Abra ken Apayao.
