BAGUIO CITY – Simmangpeten ditoy siudad ti Baguio ti sumagmamano kadagiti alumni ti Philippine Military Academy (PMA) para iti alumni homecoming dagitoy.
Kinuna ni Lt. Col. Reynaldo Balido Jr., information officer ti PMA, nangrugin metlaeng ti registration dagiti alumni.
Innayunna a naisayangkat met laeng dagiti preliminary events kas iti golf tournament ken friendly basketball event dagiti alumni.
Immunan a kinunana a manamnama a dumanon iti limaribu nga alumni ken dependents dagitoy ti dumar-ay ken makipaset iti nasao nga aktibidad.
Dinakamat ti opisyal a posible a manipud iti PMA Class of 1952 ti kalakayan a makipaset iti homecoming activity.
Kinunana nga adda ti kameng ti PMA Class of 1944 a simmarungkar sadiay idi Enero ngem posible a saan daytoy a makadar-ay iti aktibidad gapu iti kinalakay daytoy.
Agserbi a host class dagiti agleppas iti ‘2’ ken ‘7’ a tawen pakairamanan ti golden jubilarian a PMA Class of 1967 a nangadaptar kenni Pres. Rodrigo Duterte.
