BAGUIO CITY – Naideklara a peace zone ti Tabuk City, munisipyo ti Rizal, probinsya ti Cagayan ken ti Isabela kalpasan ti itataud ti tribal war wenno tribal conflict sadiay Tinglayan, Kalinga.
Iti panakipatang ti Bombo Radyo News Team, kinuna ni Kalinga acting governor James Edubba a daytoy ti nagbalin a katulagan dagiti ‘pangat’ wenno tribal leaders ti Tinglayan ken Tulgao tribes iti naangay a negosasyon dagitoy.
Kinunana a babaen iti nasao a deklarasyon ket saan a mairaman dagiti karaman kadagiti nasao a tribu nga agnanaed kadagiti nadakamat a lugar.
Malaksid iti daytoy ket saan a masinga ti panagadal dagiti estudyante a karaman kadagiti nasao a tribu.
Kinunana nga iti agdama ket ur-urayenda ti agbalin nga addang ti Tinglayan Tribe nangruna ta adda ti nadangran a kameng dagitoy iti napasamak a rinnupak idi kanikadua.
Inlawlawagna nga iti kanito a mangipakita iti senyales ti panakitunos ti Tinglayan Tribe ket maipatungpal ti Bodong wenno ti Peact Pact iti nagbaetan dagiti maseknan a tribu.
Kabayatanna, bimmaawen ti tensyon iti nagbaetan dagiti nasao a tribu.
Iti panakiuman ti Bombo Radyo News Team kenni Col. Leopoldo Imbang, dadaulo ti 503rd Infantry Brigade Philippine Army, kinunana a nagkalma ti sitwasyon iti nasao a lugar kasaruno ti katulagan iti nagbaetan dagiti ‘pangat’ wenno tribal leaders ti Tinglayan Tribe ken Tulgao Tribe.
Nupay kasta, kinuna ni Imbang nga agtultuloy ti panangipaay iti seguridad ti militar ken pulisya tapnu maliklikan ti itataud ti anyaman a gulo.
