BAGUIO CITY – Naiserbi iti uneg ti Quezon City Jail ti warrant of arrest ti driver ti pick-up truck a nagluganan ti naglibas a driver ti kotse a nangdungpar iti dua a senior citizens ken uppat nga ubbing sadiay Camp 4, Tuba, Benguet idi May 22, 2018.
Sigun kenni PCI James Acod, hepe ti Tuba PNP, inserbida ti warrant of arrest ti negosyante a ni Leymark Titigan Lim, 43-anyos, naasawaan ken residente ti Nagka-isang Nayon, Quezon City gapu iti kasao nga obstruction of justice nga addaan piyansa a P20,000.
Kinunana a nakabalud ita ni Lim gaputa nakemmeg daytoy iti kaso a panaglabsing iti RA 9165 idi July 5, 2018.
Kinunana a ni Lim ti driver ti pick-up truck a nagluganan ni Bernard Soriano ken ti kadua daytoy a babae kalpasan a dinungpar ti lugan nga imanmaneho ni Soriano dagiti biktima sadiay Camp 4, Tuba a nagresulta iti dagus nga ipupusay ti dua a senior citizens.
Naamuan ti Tuba PNP a kalpasan a dinalapos ti lugan ni Soriano dagiti biktima ket dagusda a naglugan iti kaduana a babae iti pick-up truck nga imanmaneho ni Lim a sumarsaruno laeng kadagitoy iti kalsada.
Kinuna pay ni Acod nga agtultuloy ti panakipatang ti Tuba PNP kenni Lim tapnu tumulong daytoy iti kaso ken tapnu maamuan ti paglemlemmengan ni Soriano ken ti kadua daytoy a babae.
Maipalagip pay nga adda ti nasarakan a marijuana iti uneg ti lugan ni Soriano.
