BAGUIO CITY – Maar-aramat itan kas isolation facilities dagiti uppat a district hospitals iti Benguet gapu iti agtultuloy a panagngato ti kaso ti COVID-19 a mailislista iti probinsya.
Sigun kenni Governor Melchor Diclas, dagitoy ket ti Atok District Hospital sadiay Sayangan, Atok; Dennis Molintas Memorial Hospital sadiay Daclan, Bokod; Northern Benguet District Hospital sadiay Abatan, Buguias ken ti Itogon District Hospital sadiay Tinongdan, Itogon.
Kinunana a gapu iti killaat a panagadu ti kaso ti nasao a sakit iti probinsia ket nagkurang ti isolation unit nga insagana ti provincial government isut gapuna a nasken a maaramaten kas isolation units dagiti district hospitals kadagiti nagduduma a munisipyo tapnu maakomodar dagiti pasyente ti COVID-19.
Innayonna a babaen iti daytoy ket nalaklaka ken dagus a makontrol dagiti pasyente ken maliklilkan ti ad-adda pay a panakaiwaras ti coronavirus.
Iyap-apelana met ti panangisaganan dagiti dadduma pay a munisipyo iti Benguet iti quarantine facilities dagitoy tapnu adda ti nakasagana a maaramat no bilang ad-adda a ngumato ti kaso ti COVID-19 iti probinsia.
Naamuan a napunnon ti quarantine facilities ti Tuba, La Trinidad ken Itogon gapu iti killaat a panagadu ti kaso dagitoy.
Nupay kasta, impanamnama ni Gov. Diclas a mangisagana pay ti Benguet Provincial Police Office iti kanayunan a quarantine ken isolation facilities tapnu aramaten dagiti umili ti probinsya a makaptan ti COVID-19.
