Nakemmeg dagiti uppat a Chinese nationals a mapapati nga adda iti likudan dagiti illegal a pananggun-od iti government identification cards iti pagilian idiay Puerto Princesa City, Palawan iti kaleppas a bulan sigun iti Bureau of Immigration.
Nabigbig dagiti suspect a da Wang Tao, Li Xiaoming, Guo Zhi Yang ken Lyu Zhiyang wenno Ken Garcia Lee a maipagarup a mastermind iti panakaipaay dagiti government-issued documents para kadagiti ganggannaet ken biktima ti trafficking.
Nakumpiskar pay manipud kadagiti suspect ti sumagmamano nga identification cards manipud iti Philippine Government kas iti drivers’ licenses, postal IDs, ken birth certificates.
Gapu iti dayta, awawagan ni Norman Tansingco, Commissioner ti Bureau of Immigration (BI) dagiti local government units nga ireportda iti Bureau of Immigration ti kaso dagiti foreign nationals a mangisayangkat iti illegal nga aktibidad iti lugarda, kas iti identity fraud.
Iti agdama, sumangsango dagiti nasao a suspect iti kaso a misrepresentation ken undesirability in violation iti Philippine Immigration Act of 1940.
