BAGUIO CITY – Natalgeden ti kasasaad dagiti drivers ken pasaheros a nadangran iti karambalo ti tallo a lugan iti paset ti Naguilian, Baguio City idi malem kalman.
Naduktalan iti imbestigasyon ti BCPO Station 1 a nagtaud manipud Asin Road ken paturong iti City Proper ti compact SUV nga imanmaneho ni Digna Lopez, 49-anyos.
Nupay kasta, biddot a nabadekkan ni Lopez ti gas pedal imbes a ti brake pedal rason a pimmartak ti taray ti luganna.
Gapu iti daytoy, nadungparna ti sarsarunoenna a taxi nga imanmaneho ni Christian Rodriguez, 25-anyos.
Nadungpar met ni Rodriquez ti sarsarunoenna metlaeng a taxi nga imanmaneho met ni Dominador Surat, 63-anyos rason a naidungpar iti kongkreto a poste.
Bin-ig a nagsagrap dagiti tallo a lugan ti dakkel a danyos.
Naitaray met iti pagagasan dagiti dua a taxi driver pakairamanan dagiti dua a pasahero ngem nakaruar metlaeng dagitoy.
Posible met a mapilaan ti kaso a Reckless Imprudence Resulting in Damage to Properties and Physical Injuries ti maysa kadagiti tallo a driver ti lugan a karaman iti nasao nga aksidente.
Agtultuloy met a dukduktalen dagiti otoridad ti pakabuklan a danyos dagiti tallo a lugan.
