Pimmusay ti uppat nga indibidual agraman ti agtawen ti uppat a bulan a maladaga idiay Oklahoma City.
Kasaruno ti napasamak nga adu a “tornado” wenno alipugpog a nangapektar iti US Southern Plains bayat a nasurok pito a milyon nga Amerikano ti naipasidong ti pakdaar maipapan iti nasao a bagyo.
Idi laeng kalman, indeklara ni Oklahoma Governor Kevin Stitt ti “disaster emergency for a state.”
Inaklon ti nasao nga opisial a nakaro ken kaaduan ti pannakadadael iti nasao a lugar manipod idi nagbalin a gobernador daytoy idi tawen 2019.
Iti panagtawag ti Oklahoma governor, nangipaay ni President Joe Biden ti suporta tapno naparpartak ti panangipaay ti tulong ken panagrekober dagiti naapektaran.
Maibasar iti datos nga impaulog ti National Weather Service, dumanon iti mapattta-patta a 38 nga alipugpog ti nangapektar iti lugar nu sadinno ti kangrunaan a naapektaran ket idiay Central Oklahoma idi kalman.
Sigun iti Oklahoma Department of Emergency Management, 100 ti nailista nga indibidual a nadangran iti ospital bayat a dinosdosena nga imprastruktura ti nadadael pakairamanan dagiti ospital iti ili ti Marrietta.
Iti agdama, nasurok 20,000 a customers iti nasao nga state ti agtaltalinaed nga awanan ti kuryente manipod idi kalman ti rabii.
Agtultuloy metten ti panagtrabaho dagiti kameng ti emergency personnel nu sadinno iyar-aramidda ti nadadael a dalan kasta met ti pangisublida ti suplay ti kuryente.
