Nangipila iti criminal complaint dagiti field offices ti Mines and Geosciences Bureau-Cordillera ken ti Department of Environment and Natural Resources-Cordillera idiay Abra kontra kadagiti uppat nga indibidwal gapu iti panaglabsingda iti Republic Act No. 7942 wenno ti Philippine Mining Act of 1995.
Partikular a linabsing dagitoy ti Section 53 wenno ti Illegal Transport of Minerals without an Ore Transport Permit ken ti Section 103 wenno ti Theft of Minerals.
Maibasar iti report dagiti awtoridad idi Pebrero 13, 2026, natiliwan dagiti kameng ti Bangued Municipal Police Station iti Sta. Rosa-Lipcan Diversion Road ti gandat a panangibiahe ti 18-wheeler trailer truck nga agarup iti 999 a sako ti naba a nagtaud iti kabambantayan ti Licuan-Baay, Abra.
Idi kinumprontar dagiti awtoridad ti driver ti nasao a lugan, awan ti maipakitana a mandatory Ore Transport Permit (OTP) kas maitunos iti Section ti Mining Act.
Agarup P2.9 million ti gatad ti nakumpiskar a karga a buklen ti gold nga aggatad iti P1.9 million ken copper nga aggatad iti P954,544.88.
Nakalanad iti Section 53 ti Republic Act 7942 a ti kinaawan iti permit ket maibilang kas prima facie evidence ti illegal mining.
Nailanad pay iti Section 103 a dagiti asinoman a mangidispose ken mangibiahe iti mineral nga awanan iti proper agreement wenno permit ket maibalud iti agingga innem a tawen ken mamulta dagitoy.
