MANKAYAN, BENGUET – Nailista ti Bureau of Fire Protection (BFP) – Mankayan ti uppat nga insidente ti uram manipud Enero agingga Nobyembre 7 ti agdama a tawen.
Manipud iti nasao a bilang, tallo ditoy ket structural fire ken maysa ti forest fire.
Iti interview ti Bombo Radyo, kinuna ni SFO2 Garry Calaoa, nababa daytoy nu idilig iti lima nga insidente a nairekord idi napan a tawen.
Dinakamatna a kadawyan a makagapu iti nailista nga uram ket unattended wenno accidental.
Gapu iti daytoy, nagpalagip ni Calaoa kadagiti residente a saanda a panpanawan dagiti lutlutoenda, dagiti nakasaksak nga alikamenda ken liklikanda ti agaramat ti substandard products kas ti electrical equipment.
Kabayatanna, agtultuloy ti panangipatungpal ti nasao nga opisina iti “Oplan Paalala at Iwas Paputok” kagiddan ti umadanin a holiday season.//Bombo Marinel Rodrigo