BAGUIO CITY — Imparikep ti Mines and Geosciences Bureau- Cordillera ti uppat nga usok dagiti small scale miners sadiay Tuding, Itogon, Benguet idi kalman.
Indaulwan da Mayor Victorio Palangdan ken PCI Eugene Raymundo, hepe ti Itogon PNP ti pannakaiparikep dagiti nasao nga usok ken nakipatangda pay kadagiti maseknan a minero.
Inlawlawag ni PCI Raymundo a legal ti operasyon dagiti minero iti nasao a lugar ngem ado kadagiti residente sadiay ti maap-apektaran iti operasyon ti panagminas.
Kinunana nga ado a reklamo ti naawat ti lokal a gobyerno ti Itogon ken ti opisina ti MGB-Cordillera.
Gapu iti daytoy, temperaryo a nangipaulog iti closure order ti maseknan nga opisina agingga a marisot ti pakaseknan dagiti minero ken residente sadiay.
Naamuan a dumanonen iti innem a pagminasan dagiti small scale miners ti imparikep ti pulisya sadiay Itogon ita laeng a bulan.
