Inakusaran ni sigud nga United States Secretary of State Hillary Clinton ni US President Donald Trump iti maatap a panang-cover up daytoy kadagiti dokumento ti pimmusay a sex offender a ni Jeffrey Epstein.
Sigun kenni Clinton, nabuntog launay ti panangipaay kadagiti dokumento ken kasapulanen a maiparuwar a dagus dagitoy.
Maipalagip nga idi napalabas a bulan, nangipablaak ti United States Department of Justice ti agarup talo milyon a dokumento, ladawan, ken videos maipanggep iti imbestigasyon kenni Epstein.
Kabayatanna, makita metlaeng iti Epstein files ni sigud nga United States President Bill Clinton ngem awan pay laeng ti umdas nga ebidensya a mangibaga a konektadoda nga agasawa iti kriminen ni Jeffrey Epstein.
Nabilin metten nga mangipaay ti agasawa a Clinton iti closed-door depositions idiay United States Oversight Committee a mangi-imimbestiga iti koneksyon ni Jeffrey Epstein kadagiti nangangato nga opisyal.
Sigun kenni Hillary Clinton, agparang laeng dagitoy iti komite apaman a maipablaak amin a dokumento ni Epstein.
Innayonna pay nga awan ti ilemlemeng dagitoy ken nabayagen a kidkiddawenda ti panangipablaak dagiti Epstein files. // Bombo Karen Calpoe Sapirao
