Nagpangta ni U.S. President Donald Trump a pilitenna ti Smithsonian Institution, maysa a prestihiyoso a museo, research ken education complex idiay Amerika a surotenda ti pagannurutanna kas iti inaramidna idi kadagiti unibersidad babaen iti pangta a kissayanna ti pundo dagitoy.
Sigun kenni Trump, binilinnan dagiti abogadona tapno rugianda ti proseso kontra iti Smithsonian a bukbuklen ti dua pulo ket maysa a museo ken gallery karaman ti National Zoo.
Impetteng ni Trump nga “out of control” ti nasao nga institusyon gapu ta pasig a negatibo ti ibingbinglayna maipapan iti pakaistoryaan ti Estados Unidos.
Maipalagip nga idi napan a lawas ket inwaragawag ti White House a maysa nga internal review kontra iti sumagmamano a museo ti Smithsonian kalpasan nga inakusaran daytoy ni US President Trump a mangiwarwaras iti “anti-American ideology.”
Iti agdama ket saan pay a nangipaay wenno nangiruar iti statement ti Smithsonian maipapan iti nasao nga isyu.
Ti Smithsonian ket makaaw-awat iti dakkel a pundo manipud iti US Congress ngem nawaya latta daytoy nga agaramid iti bukodna a desisyon.
Kabayatanna, naalarma met dagiti civil rights advocate iti nagbalin nga addang ni Trump gapu ta sigun kadakuada ket madadael dagiti napapateg a sursuro maipapan iti pakaistoryaan ti Amerika nangruna ta adon a dekada nga agserserbi ti Smithsonian Institution ken dakkel ti nagbalin a partena iti panagprogreso ti nasao a pagilian.//
